11
olan spiralşəkilli bəzək elementi) dolama və sonluqlarında, bəzən də müstəqil işlədilir. Onlar formasına görə
çox müxtəlifdirlər. Kompozisiyalarda sərbəst işlədilməyən islimilərin “sadə”, “qanadlı”, “haçalı”, “hörmə”,
“butalı” və s. formaları vardır.
“Xətai” də Təbriz qrupu xalçalarının bədii örtüyündə önəmli rol oynayan elementlərdəndir. Bu elementin
formasının “islimi”dən qaynaqlandığı bildirilir, fərq “xətai”nin ondan daha mürəkkəb formaya malik olma-
sıdır. “Xətai” formasına görə uzunsov olub, enli yarpağa bənzəyir, kənarları büzməli diliklər ilə əhatələnir.
“Xətai” naxışları, bir qayda olaraq, biri digərinə birləşmiş formada olur, ara sahə və haşiyədə mürəkkəb
kompozisiyaların yaradılmasında tətbiq olunur. “Xətai”lər kompozisiyaların ümumi ruhuna müvafiq daha
çox stilizə olunurlar. Bu element də “islimi” kimi xalçanın bəzək dekorunda müstəqil işlədilmir.
“Spiral” motivi dekorativ-tətbiqi sənətdə işlədilən elementlərin ən qədim tarixə malik olanlarındandır.
Bu motivin əsasını spiralvari formaların təkrarlanması təşkil edir. Əslində, spiral zahiri görünüşünə görə
gerçəklikdə tez-tez rast gəlinən forma olsa da, dekorativ-tətbiqi sənət, o cümlədən də xalçaçılıq sahəsində
fəaliyyət göstərən sənətkarlar onları həm də düşündürücü bədii-fəlsəfi məna daşıyıcısı kimi kompozisiya-
lara daxil etmişlər.
“Göl” ( Avropada ona “medalyon” deyilir) bir ornament motivi kimi Təbriz xalçalarının naxış örtüyündə
aparıcı rol oynayır. Bir qayda olaraq medalyonlar kompozisiyanın mərkəzi hissəsini, diqqətçəkən elementini
təşkil etdiyindən xalçaçılar onların müxtəlif və zəngin formalı olmasına çalışırdılar. Belə xalçalara “göllü”,
“xonçalı” və “turunclu” deyilir. Gölün – medalyonun uzunsov, dəyirmi, kvadrat, rombvari və s. formaları
mövcuddur. Onların daxili sahəsi nəbati, həndəsi naxışlar, heyvan, quş, bəzən də insan təsvirləri ilə örtülür.
“Kətəbə” forma etibarilə uzunsov formalı gölü xatırlatmaqla xalçanın orta sahəsinin əsas elementi kimi,
göllə əlaqəli və enli haşiyənin əsas elementi olaraq kompozisiyaya daxil edilir. Onların qapalı forma daşıma-
sı burada həkk edilmiş yazının xalçanın kompozisiyasında qabarıq görünməsini şərtləndirir. Kətəbələr çox
vaxt şeir parçalarından və müxtəlif yazılardan ibarət olmaqla xalçanın ornament bəzəyinə çevrilir. Onların
budaq, qönçə, quş və heyvan təsvirləri ilə zənginləşdirilməsi də Təbriz xalçalarına xas olan poetik-fəlsəfi
ovqatın gücləndirilməsi məqsədini daşıyır.
Tarixən yerli sənətkarlar tərəfindən “heykəlbaşı”, yəni, “bütbaşı” kimi də adlandırılan “qübbə” elementi
bir qayda olaraq kompozisiyada göllə əlaqələndirilmiş halda istifadə olunur və bu səbəbdən də hər ikisinin
yerliyi eyni rəngdə olurdu.
Sonrakı dövrlərdə həm də müəyyən məna kəsb edən “qübbə” yaraşıqlı qönçəni, bəzən də kasayarpaq-
lı gülü andıran müstəqil dekorativ forma almışdır. Adətən “qübbə”lərin yerliyi kompozisiyanın daşıdığı
məna-məzmun yükünə uyğun olaraq çiçəklərdən ibarət naxışlarla, bəzən də miniatür heyvanların təsvirləri
ilə bəzədilərdi.
Təbriz qrupu xalçalarında “Bulud motivləri” də tez-tez istifadə olunmuşdur. Bu elementin Azərbaycan
incəsənətində yer alması uyğur-Çin rəssamlığı ilə, uyğur sənətkarların azərbaycanlı hökmdarların sarayla-
rında çalışmaları ilə izah edilir. Çin parçalarının üzərini bəzəyən real biçimli bulud təsvirləri Azərbaycan
xalçalarında bir qədər fərqli – yerli bədii ənənələrə uyğun, müəyyən stilizəyə məruz qalmış, bir çox digər
elementlər kimi düşündürücü, eyni zamanda zərif görkəm almışdı.
“Vaq-baği” elementinin Azərbaycan incəsənətində, xüsusilə də Təbriz qrupu xalçalarında yayılmasını da
yerli sənətkarların yaxın qonşu ölkələrdəki diqqət çəkən sənətkarlıq qaynaqlarına yaradıcı münasibətlərinin
əyani təzahürü hesab etmək olar. Özündə ekzotik tutumu hifz edən bu element ilk olaraq hind incəsənətində
– xalça və parçaların bəzəklərində işlədilib. Bundan sonra əlaqələr nəticəsində Azərbaycana gətirilib və
onlar yeni təfsirdə Təbriz xalçalarının elementinə çevrilib. “Vaq-baği” zahiri görünüşünə görə stilizə edil-
miş baş təsviridir. Xalçalarda insan, quş, fil, şir, it, keçi başının bir element kimi yer alması da elə “vaq-
baği”nin təzahürü hesab olunur. Onların bir qayda olaraq bitki ornamentlərinin əhatəsində, gül-çiçək fo
nunda verilməsi də məqsədli olub, mahiyyətcə fərqli olan elementlərin sintezinin ümumi məna-məzmunun
zənginləşdirilməsinə yönəldilmişdir.
“Yelən” haşiyənin ən enli zolağı olmaqla Təbriz qrupu xalçalarının naxış örtüyündə önəmli rol oynayır.
Haşiyə sırasının mərkəzində yerləşən yelənə münasibət zaman-zaman fərqli olub. Ondan kompozisiyanın
başlıca məzmununa uyğunlaşdırılmış məna daşıyıcısı kimi, çox vaxt isə, sadəcə, mərkəzi sahəni əhatələyən,
ona kolorit baxımından yaxın olan rəngləri ilə bitkinlik verən dekorativ element kimi istifadə etmişlər.
Təbriz xalçalarında ikinci xüsusiyyət üstünlük təşkil etsə də, son dövrlərdə müasir sənətkarlar tərəfindən
yelənlərin də təkrarlanmayan element və düşündürücü məzmunla yükləndiyini müşahidə etmək mümkün-
dür. Təbriz qrupu xalçalarının yelənlərində daha çox çiçək xonçalarına, bulud motivlərinə, üzəri çiçək və
yarpaqla örtülü dalğavari budağın təsvirinə, kiçik kətəbə və spirallara, eləcə də epiqrafik bəzəyə rast gəlmək
mümkündür.
“Epiqrafik bəzək” bir element kimi Azərbaycan xalçaçılığında ən çox Təbriz qrupuna aid nümunələrdə
istifadə olunur. Əsasən “Qurani-Kərim”dən götürülmüş ayələrdən, Allahı, islam peyğəmbərini və hökm-
darları mədh edən kəlamlardan, məşhur şairlərin misralarından ibarət bu epiqrafik bəzəklər ərəb qrafika-
sında – “nəstəliq” və “nəsx” xətlə yazılardı. Azərbaycanda islam dininin yayılması Təbriz xalçaçılığında
“Namazlıq” tipli xalçaların yaranmasını şərtləndirdi ki, onların da yuxarı hissəsini – kətəbələrini bəzək
rolunu oynayan yazısız təsəvvür etmək mümkünsüzdür.
Hər bir xalçanın dəyərliliyini, bütünlükdə onun yüksək bədii-texniki xüsusiyyətləri, yəni, ecazkar naxış
örtüyü ilə yanaşı, həm də onun ovqat daşıyıcısı olan gözoxşayan, cəlbedici rəngləri şərtləndirir. Təsviri və
dekorativ-tətbiqi sənətin bütün növ və janrlarının təhlili göstərir ki, Azərbaycan xalqı, daha çox, gerçəkliyin
ümumiləşdirilmiş bədii tutumda, nikbin ovqatlı və təsirli rənglərlə dərkinə və ifadəsinə meyillidir. Bununla