38
Sürməyi yerlikli bu xalçanın ara sahəsində rombşəkilli medalyonlar, Şirvan xal-
çaları üçün xarakterik olan kənarları çıxıntılı dördbucaqlı, altıbucaqlı, qarmaqlı və
“Kəpənək” adlandırılan elementlər təsvir edilmişdir. “Kəpənək” motivləri xalçanın
əsas elementlərindən hesab olunur. Xalçanın ara sahəsinin yuxarı, aşağı, sağ sə sol
hissələrində sarı, qırmızı, ağ, sarı-zoğalı, açıq-yaşıl-zoğalı, sumağı-açıq-yaşıl, ma-
vi-zoğalı, sumağı-ağ rənglərlə işlənmiş səkkizləçəkli güllər yerləşdirilmişdir. Ara
sahənin boşluqları müxtəlif ölçülü dördləçəkli, altıləçəkli, səkkizləçəkli çiçəklər,
“S”ə bənzər, “X”ə bənzər, “nal”şəkilli, bir-birinə əks istiqamətdə birləşdirilmiş üç-
bucaqlar, altıguşəli ulduz və digər motivlərlə doldurulmuşdur. Ara sahəni ağ rəngli
diliklər əhatə edir.
Xalçanın ağ yerlikli ana haşiyəsi “hörük” adlandırılan motivlərlə bəzədilib. “Hö-
rük” motivləri zoğalı, sürməyi, mavi, tünd və açıq-yaşıl, sumağı rənglərlə tərtib
edilib. Bu motivlərin üzərində kiçik ölçülü rombşəkilli, haşiyənin boşluqlarında isə
üçbucaqlı motivlər işlənmişdir. Haşiyədəki “hörük” motivlərinin rəngi doldurucu
motivlərdə də təkrarlanır.
Xalçanın daxili bala haşiyəsi Şirvan xalçaları üçün xarakterik olan kiçik ölçülü
klassik elementlərlə bəzədilib. Bu elementlər sumağı, sürməyi, sarı, ağ, açıq və tünd-
yaşıl, mavi rənglərlə tərtib edilib. Haşiyəni içərisində dördləçəkli çiçəklər işlənmiş
mədaxillər əhatə edir.
Xarici bala haşiyədə kiçik ölçülü səkkizbucaqlı, bir-birinə birləşdirilən üçbucaqlı
motivlər təsvir edilib. Daxili bala haşiyədəki motivlərdə işlənən rənglər xarici bala
haşiyədəki motivlərdə də təkrarlanır. Xarici bala haşiyənin kənarları “Z” şəkilli
elementlərlə tamamlanır.
Xalça çox zəngin rəng tərtibatına malikdir. Rənglər bir-biri ilə
ənənəvi qanunauyğunluqla uzlaşdırılıb.
Xalçanın xovu və ərişi yun, arğacı isə pambıqdandır. Saxlanma vəziyyəti tamdır.
Xalça bədii, tarixi, elmi əhəmiyyət kəsb edir.