26
Bu tipli xalçalar Şamaxı şəhərinin cənubunda yerləşən Çuxanlı, Mərəzə, Nabur,
Sündü, Cəmcəmli və Ağsu rayonunun Göylər, Qəşəd, Hacıqabul rayonunun Pa-
dar, Udulu, Paşalı, Şorbaçı, Pirsaat çayı yaxınlığındakı Duvanlı və digər Xəzərsahili
kəndlərdə toxunmuşdur.
Şəkəri yerlikli bu xalçanın ara sahəsinin əsas bəzəyi rombşəkilli şəbəkələr
içərisində həndəsi formaya malik olan bitki motivlərindən ibarətdir. Şəbəkələri bir-
birinə dördləçəkli güllər birləşdirir. Şəbəkələrin dilikli kənarları və güllər sürməyi
rənglə, kənarlarındakı “su”lar isə sumağı rənglə tərtib edilmişdir.
Rombşəkilli şəbəkələrin içərisindəki elementlər üfüqi və maili istiqamətdə bir-birini
əvəz edir. Bu elementlər aşağıdan-yuxarıya doğru maili istiqamətdə şaxələnərək
eyni forma və eyni rənglə, üfüqi istiqamətdə isə müxtəlif forma və rənglərlə tərtib
edilmişdir.
Xalçanın ara sahəsini zoğalı rəngli diliklər və ağ, sürməyi, qırmı-
zı, mavi, sarı rəngli dördləçəkli çiçəklər işlənmiş zəncirə əhatə edir.
Zəncirələr sağ və soldan mavi və zoğalı rəngli “su”larla, yuxarı və
aşağı hissələrdə isə mavi və zoğalı rəngli “mollabaşı” motivləri ilə ta-
mamlanır.
Zoğalı yerlikli ana haşiyə “çaxmaq” adlandırılan elementlərlə bəzədilmişdir.
Bəzi toxucular bu elementləri “tilov” adlandırırlar. Bu elementlərə Bakı qrupuna
daxil olan xalçaların ana haşiyəsində də tez-tez rast gəlinir. “Çaxmaq” adlandırı-
lan elementlər sarı, açıq-qəhvəyi, sürməyi, sumağı, mavi rənglərlə tərtib edilmişdir.
Açıq-qəhvəyi, sarı, sürməyi rənglərlə işlənmiş elementlərin kənarları ağ, sumağı;
sarı rənglərlə işlənmiş elementlərin kənarları göy; bəzi göy, qəhvəyi elementlərin
kənarları isə sarı “siçandişi”lərlə tamamlanır.
Ana haşiyəni əhatə edən qara yerlikli bala haşiyələr həndəsi formalı dördləçəkli və
yaxud “dörd ünsür”, “X”-ə bənzər motivlərlə bəzədilmişdir. Bu motivlər mavi, sarı,
zoğalı, ağ, sumağı, şəkəri, sürməyi rənglərlə işlənmişdir. Bala haşiyələrin kənarları
ağ rəngli, cüzi nəzərə çarpan “Z”şəkilli elementlərlə əhatə olunub. Bu elementləri
hər iki tərəfdən zoğalı rəngli “su”lar tamamlayır.
Zəngin rəng tərtibatına malik olan bu xalçada on rəngdən istifadə olunub. Rənglər
bir-birinə qanunauyğunluqla uyğunlaşdırılaraq, hər kəsin zövqünü oxşayan rəng
palitrası yaradılmışdır.
Xalçanın xovu və arğacı yun, ərişi isə pambıqdandır. Saxlanma vəziyyəti əladır.
Xalça bədii, tarixi, elmi əhəmiyyət kəsb edir.